كتير منا بيحط لنفسة اهداف وخطط للمستقبل ولكن فى الغالب مبنحققش الاهداف او حتى بنشتغل عليها وفيه عدة اسباب للموضوع دا اهمها
• عدم وضوح الهدف وبالتالي بيقل حماسنا مع الوقت
• او عدم تحديد وقت محدد لتحقيق الهدف بالتالي يفتح باب المماطلة و التسويف و التأجيل
واسباب اخري كثيرة بتضيع اهدفنا وتخرجنا من طريق العمل على هذه الاهداف علشان كدا تم اختراع طريقة S.M.A.R.T لوضع الأهداف :
تخيل مثلا اني واضع لنفسى هدف اني اشوف كورس محدد مدته معدية 40 ساعة تفتكر لو فضلت افكر فى المدة هبدأ او حتى هيبقىى عندى الحماس والقدرة على أكمال الهدف بدون محفزات او خطة محددة وهنا بيجي دور نظرية SMART
___________________________________
S
اجعل هدفك محدد Specific :
بدل ماتحدد لنفسك عاوز أتعلم برمجة وبس !! لا خلى تفصيل هدفك محددة
لازم تحط اسئلة مهمة حول الهدف زي
- ليه عاوز اتعلم برمجة ؟
- هتعلم لغة اية من لغات البرمجة ؟
- ايه الكورس اللى هاخدة ؟ والمدة اللازمة لأنهاء الكورس ؟
- تاريخ البداية ؟ تاريخ الانتهاء من دراسة الكورس ؟
___________________________________
M
اجعل هدفك قابل للقياس Measurable :
حول هدفك لأرقم زي انا محتاج اشوف يوميا ساعة من الفيديوهات محتاج اقرأ يوميا 20 ورقة من الكتاب دا
وقيم تقدمك كل فترة بمعنى انا حققت 30% من هدفي وهكذا
___________________________________
A
اجعل هدفك قابل للتحقيق Achievable:
بمعني ماينفعش يكون وقت فراغك ساعتين وتقول انا هشوف ف اليوم ساعتين ,بالطبع مش هتلتزم بالخطة ودا هيصيبك بالاحباط
خلى اهدافك قابلة للتحقيق وبلاش تعجيز
___________________________________
R
اتأكد ان هدفك مرتبط بيك فعلا Relevant:
هل انا باخد كورس البرمجة لمجرد تضيع وقت او فضول ولا علشان انا هدفى اشتغل فى مجال العمل الحر وازود دخلي
لازم تعرف هدفك كويس وتشوف نفسك قبل الهدف وبعدة هل فعلا دا اللى انت عاوزة ؟ هل الهدف دا بيخدم باقى اهدافك ؟ لأن السعي وراء هدف انت مش محتاجها هيستهلك وقتك وفكرك ومجهودك وهيأثر بالسلب على باقى أهدافك
___________________________________
T
اجعل هدفك مرتبط بزمن محدد Time-bound:
الوقت خادع , لازم تحدد وقت واضح ومحدد لبداية ونهاية الهدف وتجزء الهدف على مراحل كل مرحلة بوقت واضح ومحدد وواقعي
ليست هناك تعليقات:
إرسال تعليق